كەجەكە: پەكەكە نەیهێشت یەكێتی تووشی ئابڕووچوونێكی گەورە بێت

Aug 28, 2017

ئەندامێكی كۆنسەی بەڕێوەبەری كەجەكە دەستگیركردنی چەند كارمەندێكی میتی توركی پشتڕاست دەكاتەوەو رایدەگەیەنێت كە  پەكەكە نەیهێشت یەكێتی تووشی ئابڕووچوونێكی گەورە بێت.

دیار غەریب ئەندامی كۆنسەی بەڕێوەبەری كەجەكە لە ئاژانسی رۆنیوزی راگەیاندوە"توركیا تەنیا بەوە لە یەكێتی ڕازی دەبوو كە هاوكاریی بكات بۆ سەرخستنی ئۆپەراسیۆنەكانی، هەروەها بەگوێرەی قسەی ئەو بەرپرسەی یەكێتی لە هەولێر پەكەكە كاتێك تۆمەتبار نەدەبوو كە ملی خۆی بخاتە بەردەستی میت و جەندرمەی تورك و خۆی بكاتە قوربانیی، هەر بۆیە ئەو پرسە دێتە پێشەوە كە ئایا ڕەوایە دەوڵەتی توركیا لە ناو خاكی باشووری كوردستاندا لە دژی هێزێكی كوردی ئۆپەراسیۆن بكات؟ ئایا ڕەوایە كە یەكێتی هاوكاری ئۆپەراسیۆنی بەو شێوەیە بكات؟ ئایا ڕەوا نییە پەكەكە یان هەر ڕێكخستنێكی كوردی تر لەبەرامبەر ئۆپەراسیۆن و هێرشی داگیركەران خۆیان بپارێزن؟".

دیار غەریب، سەبارەت بە هەڵوێستی یەكێتی و سیاسەتەكانی بەرانبەر پەكەكە دەپرسێت ئایا دەبێت هێزی یەكێتی بكەوێتە پێش هێزی ئۆپەراسیۆنی توركیاوە، ببێتە چاوساغ و كەوا سووری بەر لەشكریان و دژی پەكەكە ئۆپەراسیۆن ئەنجام بدەن تەنیا بۆ ئەوەی دڵی دەوڵەتی توركیا و ئەردۆغان گەرد نەگرێت؟‌ ئاماژە بەوەش دەكات كە هەڵوێستی بەو شێوەیە یەكێتی بەرەو كوێ دەبات‌و هەر كەسێكیش دەزانێت نە لەڕووی سیاسییەوە نە له ‌ڕووی یاساییەوە نە لە ڕووی نەتەوەییشەوە ئەوه ‌كارێكی ڕەوا و ڕاست نییه ‌و دەبێت هەڵوێستەكان پێچەوانەی ئەوە بێت.

ئەندامەكەی كۆنسەی بەڕێوەبەری كەجەكە ئەوەی خستەڕوو كە  پەكەكه دەتوانێت دەستگیركردنی ئەو بەرپرسانەی میت كە خواستویانە سنووری ئیدارەی سلێمانی بكەنە جێگەی پلاندانان بۆ كردەوەیەكی قێزەون و دیارترین بەرپرسانی پەكەكە تیرۆر بكەن، بكاتە هەواڵ و لە ڕاگەیاندندا بڵاوی بكاتەوە، بەوتەی خۆشی كە پەكەكە  ئەوەی نەكردووە بۆ ئەوەبووە كە خەڵكی كوردستان پەنجەی تاوان بۆ یەكێتی و بەرپرسانی ئیدارەی سلێمانی درێژ نەكەن، ئێستاش ئەگەر پێویست بكات دەتوانێت بیانداتە ڕاگەیاندن.

هەروەها غەریب داوا لەیەكێتی  دەكات كە چۆك بۆ فشارەكانی دەوڵەتی تورك دانەدات، چونكە دەوڵەتی توركیا كاری ناقانوونی دەكات، هاوكات دەستخۆشی لە پەكەكەش بكات كە ئۆپەراسیۆنەكەی دەوڵەتی توركیای پووچەڵ كردوەتەوه ‌و ڕێگای نەداوە یەكێتی تووشی ئابڕووچونێكی مەزن ببێت.

هاوكات ئەندامەكەی كۆنسەی بەڕێوەبەری كەجەكە داواش لە مەكتەبی سیاسی یەكێتی دەكات كە هەرچی دیبلۆماتی توركیایە لە سنووری سلێمانیدا بیاننێرێتەوە بۆ توركیا و كاری سەرجەم كۆمپانیا توركییەكان ڕابوەستێنێت، دەبوایە یەكێتی خۆی نوێنەرەكەی خۆی بانگ بكردایەتەوه.


ئەم بابەتە 1279 جار بینراوە.