پەیمانگاى ستۆکهۆڵم؛ کودەتاکە سیناریۆى ئەردۆغان خۆى بوە

Jul 17, 2017

بەبۆنەى یادى یەکساڵەى کودەتاکەى تورکیاوە، پەیمانگاى ستۆکهۆڵم بۆ ئازادى راپۆرتێکى 191 پەڕەیى بڵاوکردۆتەوەو دەیسلەمێنێت کەخودى ئەردۆغان داڕێژەرى ئەو سیناریۆیە بوە کەناوى نا کودەتا.

پەیمانگاى ستۆکهۆڵم دەڵێت ئامانجى ئەو سیناریۆیەى ئەردۆغان بۆ سەرکوتکردن و لاوازکردنى نەیاران و ئۆپۆزسیۆن و رەخنەگران بوە، بۆ ئەوەش راپۆرتەکە پشتى بەزانیارى و چاوپێکەوتن لەگەڵ ئەفسەرانى سوپاو دادوەرو لیکۆڵەرو شارەزایان بەستوە.

لەراپۆرتەکەدا هاتوە ئەوەى لەلایەن دەسەڵاتدارانى تورکیاوە ناوى نراوە کودەتا لەراستیدا نەک کودەتا نەبوە، بەڵکو سیناریۆ بوە، لەلایەن ژمارەیەکى کەم سەرباز و لەچەند شارێک و بەڕێوەبردنێکى خراپ. لەبەرامبەردا ئەردۆغان سەرۆکایەتى مسۆگرکردو بەرژەوەندییەکانى خۆى بردە پێشەوەو روبەڕووى ئۆپۆزسیۆن و رەخنەگران بویەو پەیمانگاى ستۆکهۆڵم چەند لایەنێک دەوروژێنیت:
یەکەم: ئەو لێدوان و قسەو زانیارییە دژ بەیەکانەى لەماوەى سەرەتاى روداوەکەوە لەلایەن دەسەڵاتەوە کراون.
دووەم: هاکان فیدان پێشوەخت زانیارى لابوەو ئەردۆغان و سەرۆکى حکومەتى ئاگادارنەکردۆتەوە، ئەمەش دەیسەلمێنێت کەئەو روداوەدروستکرابوە.
سێیەم: لیژنەى لێکۆڵینەوەى پەرلەمانى تورکیا بەهیچ جۆرێک نە وەک شاهیدو نەوەک گومانلێکراو قسەى لەگەڵ هاکان فیدانى سەرۆکى دەزگاى هەواڵگرى - میت نەکردوەو لەپۆستەکەشى هێڵدراوەتەوە.
چوارەم: چاوپێکەوتنى هاکان فیدان رۆژێک پێش "کودەتاکە" لەگەڵ بەرپرسانى باڵاى سوپاو رۆیشتنى بۆ سەرۆکایەتى ئەرکان، هیچ شیکردنەوەو پاساوێکى بۆ نەدۆزراوەتەوە.
پێنجەم: خەلوسى ئاکار سەرۆک ئەرکانى سوپاى تورکیا لێدوانى دژبەیەکى داوە، بەگوێرەى ئەو شارەزا سەربازییانەى کەپەیمانگاى ستۆکهۆڵم راى وەرگرتون، دەتوانرێت بەرێگاى ئاسان و خێرا رێگە لەکودەتابگیرێت، لەکاتێکدا پەنا نەبرا بۆ ئەو رێکارانە، کەئەوەش گومانى زۆر دەخاتە سەر روداوەکان.
شەشەم: راپۆرتەکە سەرسوڕمانى خۆى لەمامەڵەى ئەفسەرانى سوپا دەردەبڕێ کەخەریکى ژیانى رۆژانەى خۆیان و ئاهەنگ بون، لەسەروبەندى "کودەتاکە" دواى ئەوەشى هەڕەشەى کودەتاکەیان پێگەیشتوە.کەئەوەش لەگەڵ نەریت و مومارەسەو شێوازى تەقلیدى کارى سوپاى تورکیادا نایەتەوە.
حەوتەم: بەگوێرەى بەیاننامەى رەسمى 8651 ئەفسەرو سەرباز لە"کودەتاکە"ەوە گلاون کەدەکاتە 1.5% ى رێژەى سوپاى تورکیا، کەئەوە گوزارشت لەقەبارەى ئەو جوڵەیە ناکات کەلەواقیعدا بینرا، لەبەرامبەردا 168 جەنەراڵ و هەزاران سەرباز دادگاییدەکرێن، شارەزایانى سەربازى پێیان سەیرە کەچۆن بەو ژمارە کەمەوە ئەوە کراوە، لەکاتێکدا بەگوێرەى خەمڵاندنەکان ئەو سەربازانەى لەژێر فەرمانى ئەو جەنەراڵانەدان نزیکەى 200 هەزار سەربازن.
هەشتەم: روداوى سەیر داخستنى تەنها راڕەوێکى پردى بۆسفور و بەئامانجگرتنى هەندێک شوێن کەسودى بۆ لایەنى کودەتاچى نیەو سودى بۆ سیاسییەکانە، وەک کوشتنى هاوڵاتیانى مەدەنى و پەلاماردانى دەزگاو دامەزراوەکان بەژمارەیەکى کەم سەربازەوە.
نۆیەم: دواى ساڵێک لەروداوەکە هێشتا حکومەتى تورکیا نەیتوانیوە هیچ بەڵگەیەکى بڕواپێهێنەر بخاتەڕوو کەرەوتى فەتحوڵا گیولەن لەپشتى "کودەتاکەوەن" ، ئەو وتانەشى وەرگیراون لەژێر فشارو ئەشکەنجەدا وەرگیراون، گیولەنیش بەپەیمانگاى ستۆکهۆڵمى وتوە ئەوەى رویدا سیناریۆیەکى قێزەونى ئەردۆغان و دارودەستەکەی بوە.
دەیەم: هەندێک راپۆرت ئاماژە بۆ ئەوە دەکەن لەکاتى روداوەکەدا پۆلیسى تورکیا جۆرە چەکێکى بەسەر هاوڵاتیانى مەدەنیدا دابەشکردوەو ناسنامەى ئەو گروپە سەربازییە نانیزامیەش ئاشکرانەبوو کەهێنرایە شەقامەکان .


ئەم بابەتە 242 جار بینراوە.